Novas

A Concellería de Benestar Social do Concello de Ourense convoca bolsas de comedor escolar para o novo curso 2008/2009. Os interesados poden presentar a súa solicitude ata o día 2 de outubro na Concellería de Benestar Social do Concello de Ourense, na rúa Bispo Carrascosa, número 14, teléfono 988 388137, os luns, mércores e xoves, de 9 a 12 horas. Os requisitos para acceder ás axudas son estar empadroados en Ourense e non exceder duns ingresos netos de 3.500 euros por membro de unidade familiar ó ano. A estes efectos, computarase como membros familiares a tódalas persoas que convivan no enderezo familiar.

O ano pasado beneficiáronse destas bolsas un total de 289 alumnos, dos que 114 eran usuarios dos comedores dos colexios públicos e 159 dos centros concertados.

O programa de becas da Concellería de Benestar Social compleméntase coas axudas para comedores que facilita a Concellería de Educación. Este departamento concede unha subvención de 10 euros ó mes para tódolos alumnos usuarios dos comedores escolares de centros públicos que xestionan as APAs de Ourense.

Combinando ambas axudas, os alumnos de familias con ingresos que non superan os 3.500 euros por membro de unidade familiar ó ano disfrutan con custe cero dos comedores dos centros públicos xestionados polas APA´s. No caso dos alumnos de centros concertados, a axuda da Concellería de Benestar Social é de 45 euros ó mes.

Becas para libros de Educación Infantil

Tamén estes días, a Concellería de Benestar Social do Concello de Ourense está a facilitar as becas para que concede a familias con escasos recursos económicos para a adquisición de libros para o novo curso escolar en Educación Infantil. As axudas chegarán a un total de 184 alumnos, dos que 114 alumnos acuden a colexios públicos e 70 a concertados. As familias ás que lles foi concedida esta axuda poden recoller na Concellería de Benestar Social un vale para canxear nas librerías co que recibirán tódolos libros do novo curso escolar.