Novas

O alcalde de Ourense, Francisco Rodríguez, e a concelleira de Benestar Social, Marga Martín inauguraron no Auditorio o programa de cursos e obradoiros de ocio activo para as persoas maiores que organiza o Concello para o curso 2010/2011. O programa reforza este ano a súa oferta de actividades, cun total de 18 propostas lúdicas e formativas diferentes, aumenta a 869 o número total de participantes (115 máis que no curso pasado), e incorpora a 258 alumnos que por primeira vez participarán neste programa de tempo de lecer para os maiores de 60 anos residentes na cidade.

O programa dá continuidade ós cursos desenvoltos en exercicios anteriores, con propostas en materia de manualidades, informática, estimulación da memoria, risoterapia, ou exercicio saudable, entre outros. Tamén incorpora novas propostas, como o cachibol, con 36 prazas, e reforza os cursos de Tai Chi, que duplica o número de prazas (50), e Informática (con 6 grupos máis) para dar resposta á alta demanda de participantes.

Ó acto de presentación, que tivo lugar no Auditorio Municipal, asistiron os alumnos que participan no programa, que engloba as seguintes propostas:

- Iniciación á informática: 5 grupos, con 70 prazas en total

- Informática- nivel perfeccionamento: 4 grupos, con 56 prazas

- Informática- nivel avanzado: 2 grupos, con 28 prazas

- Pintura: 3 grupos, con 48 prazas

- Manualidades: 2 grupos, con 70 prazas

- Música: 1 grupo, 50 prazas

- Teatro: 1 grupo, 25 prazas

- Curso de Actividade física e memoria: 1 grupo, 30 prazas

- Risoterapia: 1 grupo, 35 prazas

- Estimulación da memoria: 4 grupos, 100 prazas

- Animación á lectura: 1 grupo, 30 prazas

- Habilidades Sociais: 1 grupo, 30 prazas

- Tai-chi: 2 grupos, 50 prazas

- Pilates: 2 grupos, 36 prazas

- Ximnasia: 3 grupos, 75 prazas

- Natación- nivel iniciación: 2 grupos, 50 prazas

- Natación- nivel perfeccionamento: 2 grupos, 50 prazas

- Cachibol (novidade este ano): 2 grupos, 36 prazas

Os cursos están dirixidos a persoas maiores de 60 anos empadroadas no Concello de Ourense, que teñen a posibilidade de participar nun ou máis cursos, cun máximo de 5 por persoa. Na convocatoria 2010/2011 cubríronse a totalidade de prazas ofertadas: 869 (115 máis ca no pasado curso 2009/2010), cun total de 39 grupos. O número total de persoas diferentes que participan nos cursos é de 578, dos que 258 farano por primeira vez neste curso.